Volver á páxina principal
 

Real Filharmonía de Galicia

        Real Filharmonía de Galicia   Antoni Ros Marbà

 



       A Real Filharmonía de Galicia naceu publicamente o 29 de febreiro de 1996 cun concerto dirixido polo entón titular, o mestre alemán Helmuth Rilling. Dende aquela, convertida no eixo fundamental das temporadas estables e en protagonista de novos ciclos dentro da programación deste centro cultural, tivo á fronte, ademais do mestre Rilling e do seu segundo director, o compostelán Maximino Zumalave, a directores invitados como os españois García Navarro, Odón Alonso, Enrique García Asensio, Edmon Colomer, Pedro Alcalde, e internacionais como Sir Neville Marriner, David Shallon, Jeffrey Kahane, Gilbert Varga, Leopold Hager, Kryzstof Penderecki, Christoph Poppen, Jan Latham-Koenig, Antonio Florio e Sir Peter Maxwell Davies, entre outros.

       Como solistas, presentáronse coa RFG, entre outros, os violinistas Frank Peter Zimmermann e Ulrike-Anima Mahté, o violonchelista M. Rostropovich, a mezzosoprano Teresa Berganza, os pianistas Alicia de Larrocha, Tzimon Barto, Nikolaus Lahusen, Jeffrey Kahane, Rudolf Buchbinder, Robert Levin, Joaquín Achúcarro, Katia e Marielle Labèque, Evgeni Koroliov e György Sebök e o frautista Jean-Claude Gérard.

Tras eventos de consolidación como os debuts de 1996 no Auditorio Nacional en Madrid, e de 1997 na Coruña, Valencia e León, a Real Filharmonía de Galicia -aínda sen cumpri-los dous primeiros anos de existencia- saíu en xaneiro do 98 á conquista dos esixentes públicos alemán e austríaco, nunha primeira xira internacional realizada con Helmuth Rilling e o coro Gächinger Kantorei de Stuttgart. As Estacións de J. Haydn e O Mesías de Haendel (versión W. A. Mozart) foron interpretados ante máis de 7.000 espectadores. No peche da xira, a Real Filharmonía de Galicia constituíase na primeira orquestra española en actuar no Grosses Festspielhaus de Salzburgo durante a tradicional Semana Mozart. A prensa alemana, austríaca e española reseñou amplamente estes triunfos: "A orquestra española utilizou o seu debut en Stuttgart para demostrar unha substancial articulación, elegancia no son das cordas e gráciles escenas nos ventos" (Stuttgarter Nachrichten). "A Real Filharmonía fai historia" (El Mundo). "O éxito dos galegos foi incuestionable…" (J. A. Vela del Campo, El País).

       En marzo do 98 comezaron a gravar con Rilling as sinfonías completas de Franz Schubert para a prestixiosa compañía discográfica Hänssler Classic. Este proxecto culminou coa saída ó mercado dos dous primeiros CD coas Sinfonías nº 1, 2, 3 e 4.
En xullo, baixo a dirección de Zumalave, a orquestra actuou no marco da Expo-98 de Lisboa. En agosto inaugurou, co Mesías de Haendel (versión Mozart), a primeira edición do Compostela Millenium Festival, concerto ofrecido na Catedral de Santiago ante máis de 2.000 persoas.

       No mes de xaneiro do 99 realizou a súa segunda xira internacional, na que interpretou o Elías de Mendelssohn no Auditorio Nacional de Madrid, como parte do ciclo "Orquestas del Mundo" de Ibermúsica, e no Festival Europeo da Música de Stuttgart. O altísimo nivel acadado pola orquestra, coro e solistas converteu a interpretación do oratorio do compositor alemán en inesquecible e altamente eloxiado pola crítica internacional.

Ademais a RFG foi unha das orquestras invitadas do XXIV Festival Internacional de Música de Segovia, do Festival Internacional de Música de Galicia e, na II Edición do Compostela Millenium tocou baixo a batuta de Sir Neville Marriner na Catedral de Santiago.

       A Real Filharmonía afronta unha nova temporada tendo á súa fronte como titular ó mestre catalán Antoni Ros Marbà, e dentro do seu traballo cotián segue enriquecendo o seu variado repertorio, que vai de Bach á actualidade con énfase sobre autores do clasicismo vienés, e asumindo plenamente a súa responsabilidade de dar saída a obras de compositores galegos, de varios dos cales protagonizou estreas absolutas.
Ademais de estar incorporada á firme tradición de 11 anos dos "Concertos Didácticos para Xoves" que ofrece o Auditorio ós colexios e institutos galegos, a orquestra ten a tarefa de protagonizar, cada agosto, o ciclo de música española co que o Auditorio de Galicia se suma á celebración de "Música en Compostela", o curso internacional de música máis antigo de España. A isto deben engadirse a organización e interpretación do ciclo "Abertos de Cámara".

       Os obxectivos da Real Filharmonía de Galicia vense reforzados coa Escola de Altos Estudios Musicais, proxecto pedagóxico de formación de músicos de alto nivel baixo a xestión do Instituto Galego das Artes Escénicas e Musicais (IGAEM).

 

Antoni Ros Marbà, director


       Naceu en Barcelona, comeza a formarse musicalmente no Conservatorio Superior de Música desa mesma cidade. Estudiou dirección de orquestra con Eduard Toldrá en Barcelona, con Sergiu Celebidache na Academia Chiggiana de Siena e Jean Martinon en Düsseldorf, onde obtivo o Primeiro Premio de Fin de Curso.

       En 1966, ó ser fundada a Orquestra Sinfónica da RTVE en Madrid, consegue por oposición, a praza de Director Titular. Ese mesmo ano, élle concedido o Premio Internacional do Disco Arthur Honegger pola súa gravación das Sete Palabras de Cristo de Haydn.

       En 1967 foi nomeado Director Titular da Orquesta Ciutat de Barcelona, en 1978 Director Musical da Orquesta Nacional de España, e en 1979 Principal Director Invitado da Orquestra de Cámara Neerlandesa, da que será, posteriormente, Director Titular.
En 1978 debutou, invitado polo Mestre Herbert von Karajan, en Berlín coa Orquestra Filharmónica, orquestra que dirixirá de novo en 1982. No campo sinfónico, tamén obtivo notables éxitos dirixindo as orquestras máis importante de Francia, Inglaterra, Suíza e Italia e nos principais centros musicais de América, Xapón e China.

       Durante as últimas temporadas o mestre Ros Marbà dirixiu con frecuencia orquestras españolas como a Orquesta Nacional de España, Orquesta Sinfónica de Barcelona, Orquesta Nacional de Catalunya, Orquesta Sinfónica e Coro de Radio Televisión Española, Orquesta Sinfónica de Tenerife, Orquesta de Valencia, sen deixar de acudir ás súas citas anuais con orquestras alemanas e dos Países Escandinavos.

       Como director de ópera, destacan os seus éxitos nas obras de Mozart: Don Giovanni, Così fan tutte, As vodas de Fígaro e A frauta máxica; Strauss: Elektra e Salomé; Verdi: Falstaff e Otello; Puccini: La Bohème e Madama Butterfly; Rinaldo de Haendel; Wozzeck de Berg; Carmen de Bizet e O Holandés Errante de Wagner; Iphigenie en Tauride de Gluck e Der Freischütz de Weber.

       Hai que destaca-la súa dirección de: Salomé, no Gran Teatre do Liceu de Barcelona, Carmen no Teatro Lírico Nacional La Zarzuela de Madrid, e a primeira producción mundial da ópera The Duenna de Robert Gerhard en ámbolos teatros.

       Antoni Ros Marbà gravou para Auvidis, Doña Francisquita, Bohemios, La Verbena de la Paloma e Goyescas. Así mesmo a súa orquestración e gravación con Victoria de los Ángeles, de Canciones de Mompou, está considerada coma unha das mellores existentes no mercado internacional sobre temas de música española.

       Foille concedido o Premio Nacional de Música, galardón que outorga o Ministerio de Cultura e a Creu de Sant Jordi outorgada pola Generalitat de Catalunya.

       En agosto de 1995 dirixiu a Royal Philharmonic Orchestra nos Festivais de Santander e Perelada. En maio e xuño do 96 dirixiu The Duenna de R. Gerhard para Ópera North en varias cidades inglesas. En outubro dirixiu Idomeneo para a Scottish Ópera de Glasgow e Edimburgo, producción que obtivo o premio Barclays Theatre Award en 1997. En outubro de 1997 dirixiu a adaptación á ópera por A. García Abril da obra de D. Ramón María del Valle-Inclán Divinas Palabras, que obtivo un gran éxito.

       O Mestre Ros Marbá dirixiu a primeira gravación mundial da ópera La Dolores de Tomás Bretón coa Orquestra Simfónica de Barcelona i Nacional de Catalunya.

       Na pasada temporada dirixiu Don Carlo de Verdi no Teatro de La Maestranza de Sevilla, Parsifal de Wagner no Liceu, Il Trittico de Puccini na Ópera de Oslo e The Turn of the Screw de Britten no Teatro de la Zarzuela de Madrid.

       En outubro de 1999 dirixiu Don Giovanni de Mozart en Las Palmas de Gran Canaria e en decembro The Makropoulos Case de Janacek no Gran Teatre del Liceu de Barcelona. Entre os seus futuros proxectos cabe destacar, Goyescas no Teatre del Liceu e Teatro Real de Madrid, e Billy Budd tamén no Liceu.